१३ बैशाख, २०८१ | 25 Apr, 2024
काठमाडौं । डा.बाबुराम भट्टराई जनता समाजवादी पार्टी नेपालको संघीय परिषद् अध्यक्षभएका छन् । पार्टीको कार्यकारिणी समितिको बैठकले डा. भट्टराईलाई सो जिम्मेवारी दिएको हो ।
पार्टी स्रोतले जनाए अनुसार उनी पार्टीको वरियताक्रमको एक नम्बरमा रहनेछन् । यद्यपि, यसबारे पार्टीले कुनै औपचारिक जानकारी गराएको छैन ।
यसअघि पार्टी दार्ता गर्ने क्रममा उनले आफूलाई एक नम्बरमा राख्न भनेका थिए तर महन्थ ठाकुरले त्यतिबेला मानेका थिएनन् । उनको पदबारे विवाद भएपछि आफू संघीय परिषद्का अध्यक्षमा नबस्ने बरु वरिष्ठ नेतामा बस्ने भन्दै संघीय परिषदको अध्यक्षमा टिपेक्स लगाएर वरिष्ठ नेतामा चित्त बुझाएका थिए ।
तर अहिले कार्यकारिणी समितिको बैठकले उनलाई संघीय परिषद्को अध्यक्ष दिएर वरियताक्रमको एक नम्बरमा राखेको छ ।
त्यसैगरी, बैठकले ७७९ सदस्यीय केन्द्रीय समितिको पनि घोषणा गरेको छ । यसअघि ७०१ सदस्यीय कार्यसमिति प्रावधान थियो तर केन्द्रीय सदस्यहरुको आकाँक्षी बढेपछि विधान संशोधन गरेर सङ्ख्या बढाएर ८०१ सदस्यीय गरेको छ । दुईजना पछि मनोनित गर्ने बताइएको छ । बैठकले विभिन्न विभाग र आयोगमा कार्यविभाजन पनि गरेको छ । २९ वटा विभाग बनेको छ ।
