१५ चैत, २०८० | 28 Mar, 2024
काठमाडौं । पछिल्लो २४ घण्टामा देशभर १ हजार ७ सय ३ जना कोरोना संक्रमित थपिएका छन् । स्वास्थ्य तथा जनसंख्या मन्त्रालयले १० हजार ४६० जनाको पीसीआर परीक्षण गर्दा उक्त संख्यामा संक्रमित भेटिएको जानकारी गराएको हो । यो सँगै नेपालमा कोरोना भाइरसबाट संक्रमित हुनेको संख्या २ लाख २९ हजार ३४३ जना पुगेको छ ।
त्यस्तै, पछिल्लो २४ घण्टामा १ हजार २ सय ३६ जना संक्रमित निको भएर घर फर्किएको मन्त्रालयले जनाएको छ । यो सँगै नेपालमा कोरोना भाइरसको संक्रमण जितेर घर फर्किनेको संख्या २ लाख ९ हजार ४३५ जना पुगेको छ । यता पछिल्लो घण्टामा उपत्यकामा ८ सय २२ संक्रमित थपिएका छन् ।
मन्त्रालयले दिएको जानकारी अनुसार ३ सय ७९ जना महिला र ४ सय ४३ जना पुरुष संक्रमित रहेका छन् ।
योसँगै काठमाडौं उपत्यकामा संक्रमितको संख्या १ लाख ७ हजार १२४ जना पुगेको छ । यस्तै पछिल्लो २४ घण्टामा देशभर २३ जना संक्रमितले ज्यान गुमाएका छन् ।
यो सँगै नेपालमा कोरोना भाइरसको संक्रमणबाट मृत्यु हुनेको संख्या १ हजार ४३५ पुगेको छ । अघिल्लो दिन बिहीबार पनि २३ जना संक्रमितको मृत्यु भएको थियो । हाल देशमा सक्रिय संक्रमितको संख्या १७ हजार २३७ छ ।