१५ बैशाख, २०८१ | 27 Apr, 2024
काठमाडौं । तेजाब तथा अन्य घातक रासायनिक पदार्थ नियमन अध्यादेश २०७७ जारी भएको छ । राष्ट्रपति विद्यादेवी भण्डारीले एसिड आक्रमण गर्नेमाथि कडा कारबाहीको व्यवस्थासहित सरकारले ल्याएको अध्यादेश जारी गरेकी हुन् ।
राष्ट्रपति कार्यालयले सोमबार जारी गरेको अध्यादेश नेपालको संविधानको धारा ११४ को उपधारा १ अनुसार भएको जनाएको छ । सरकारले अध्यादेशमार्फत कानून संशोधन गरी एसिड आक्रमण गर्नेमाथि २० वर्षसम्म कैद र १० लाख रुपैयाँसम्म जरिवानाको व्यवस्था गरेको हो ।
गएको बिहीबार बसेको मन्त्रिपरिषद् बैठकले एसिड आक्रमण गर्नेमाथि सजाय बढाउने गरी अध्यादेश ल्याएको थियो ।
राष्ट्रपति भण्डारीले तेजाब तथा अन्य घातक रासायनिक पदार्थ नियमन अध्यादेश २०७७ सँगै फौजदारी कसुर तथा फौजदारी कार्यविधिसम्बन्धी केही ऐन संशोधन गर्ने अध्यादेश २०७७ र नेपाल प्रहरी र प्रदेश प्रहरी पहिलो संशोधन अध्यादेश २०७७ पनि जारी गरेको राष्ट्रपति कार्यालयले जानकारी दिएको छ ।
