१५ बैशाख, २०८१ | 27 Apr, 2024
काठमाडौं । चर्चित गायक रामकृष्ण ढकाल र उनकी श्रीमती नीलम शाह ढकालबीच सम्बन्ध विच्छेद भएको छ । विहे गरेको १७ वर्षपछि बुधबार उनीहरुबीचको सम्बन्ध टुंगिएको हो । उनीहरुले जिल्ला अदालत काठमाडौंमा गएर आपसी सहमतिमै सम्बन्ध विच्छेद गरेका हुन् ।
यसअघि मंगलबार नीलमले अदालतमा रामकृष्णसँग सम्बन्ध विच्छेद गरी पाऊँ भनेर निवेदन दर्ता गराएकी थिईन् । निलमले रामकृष्णसँग अंश नलिने र छोरी आफैसँग राख्ने गरी सम्बन्ध विच्छेद भएको अदालतले जनाएको छ ।
जिल्ला अदालतका काठमाडौंका न्यायाधीश विदुर कोइरालाको एकल इजलासले रामकृष्ण र नीलमबीच सम्बन्ध विच्छेद भएको फैसला सुनाएको हो । रामकृष्ण र निलम दुबैले ‘सम्बन्ध विच्छेद गर्न मञ्जुर छौँ’ भन्ने सहमतिपत्रमा हस्ताक्षर गरेका छन् ।
विक्रम संवत् २०५९ सालमा रामकृष्ण र नीलमबीच प्रेम विवाह भएको थियो । उनीहरुको एक छोरी छिन् । नीलमले रामकृष्ण ढकालका केही गीतमा मोडलिङ समेत गरेकी छन् ।
