७ जेठ, २०८१ | 20 May, 2024
पोखरा । पोखरमा क्वारेन्टाइनमा राखिएका एकजनाको मृत्यु भएको छ । केही समय अघि भारतको हैदराबादबाट नेपाल फर्किएका व्यक्तिको पश्चिमाञ्चल क्षेत्रीय अस्पतालमा मृत्यु भएको हो ।
अस्पतालका अनुसार मृतकको स्थायी ठेगाना कास्कीको रुपा गाउँपालिका रहेको छ । लामो समयदेखि मुटुको रोगले थलिएका उनलाई हिजोदेखि रुपा गाउँपालिकाको क्वारेन्टाइनमा राखिएको थियो ।
गाउँपालिका अध्यक्ष नवराज ओझाका अनुसार मृतक लामो समयदेखि मुटुको रोगी थिए । उनको कलेजोमा पानी जमी राखेको सुन्नमा आएको उनले सुनाए । पश्चिमाञ्चल क्षेत्रीय अस्पतालका निर्देशक डाक्टर अर्जुन आचार्यका अनुसार उनलाई अस्पताल ल्याउनुअघि नै मृत्यु भई सकेको थियो ।
डा. आचार्यले कोरोना भाइरसको संक्रमण भए नभएको भने पुष्टि नभएको बताए । ‘परिक्षणका लागि प्रदेश ल्याबमा पठाएका छौं,’ उनले भने, ‘कोरोना नै भएको भनेर भन्न मिल्दैन । ल्याबको रिपोर्टपछि नै थाहा हुन्छ ।’
